i will have to tell you..

അവിടെത്തന്നെ നിര്‍ത്തുന്നത്

2010-01-07T17:13:00.002+05:30

ഒരുവള്‍

ഇപ്പുറത്ത് അടഞ്ഞുകിടക്കുന്ന

വാതിലിന്റെ

ഇടുങ്ങിയ വിടവുകളിലൂടെ

പുറത്തേക്കു നോക്കിനില്‍ക്കുന്നു.

ഒരുപാടു നേരമായിക്കാണണം.

മുഷിഞ്ഞ വെള്ളഷര്‍ട്ടും മുണ്ടുമെന്ന്

കയറ്റത്തില്‍ ചവിട്ടുന്നുണ്ടാരെയോ

തളര്‍ന്നുതുരുമ്പിച്ച ഒരു സൈക്കിള്‍.

വാതിലിനു തൊട്ടുമുന്നില്‍

ഓറഞ്ചു വില്‍ക്കുന്ന

ഒരു മധ്യാഹ്നം.

നോട്ടം,

പതിഞ്ഞ്

കനത്ത്

വരുന്നവരെയും

പോകുന്നവരെയും

ഉരസുന്ന

നീണ്ട നിസ്സംഗത.

എന്തുമാത്രം കാണണം

ഈ നഗരത്തില്‍ ഇത്തരം വാതിലുകള്‍,

എന്നോര്‍ത്തുനില്‍ക്കുമ്പോഴാണ്

ഞാനവളെ കാണുന്നത്

അവള്‍ കാണുന്നത്.

പിന്നെയും

നോക്കുകയും

നോക്കപ്പെടുകയും ചെയ്യുന്നു

അതേ പ്രതിസന്ധി.

തിരിച്ചു ചിരിച്ച്

അവള്‍

ഒരു ചായകുടിക്കുന്നോ

എന്നൊക്കെ.

പുറത്തേക്കു നോക്കിനില്‍ക്കുന്ന

മറ്റൊരാള്‍കൂടി

എന്നയല്‍ഭുതം തന്നെയാവണം

അവളെ പിന്നെയും

അവിടെത്തന്നെ നിര്‍ത്തുന്നത്.

മഴ, നീ, ഞാന്‍.

2009-12-10T14:18:00.009+05:30

ഈ

മ

ഴ

യി

ല്‍

നീ
പിന്നെയും

ഉ

രു

കി

യൊ

ലിക്കു

ന്നു.

നഗരാതിര്‍ത്തിയിലെ കടല്‍

തോടുകള്‍

ഓടകള്‍

പരന്നൊഴുകുന്ന റോഡ്

ഇത്തവണ

ഞാനെവിടെയാണു

തപ്പുക?

could the title be 'just as it is' ?

2009-12-05T10:27:00.002+05:30

on beer froth
floating
bubbles burst
and you say
'you irritate'

long sleep
i wake up
and say
'you self-obsessed'

on a bed, lying,
we
gaze endlessly
at plain white ceiling
moving images
civilisations
two of us
naked
or,
was it sometime ago?

എന്തും എപ്പോള്‍ വേണമെങ്കിലും സംഭവിക്കാം.

2009-09-03T23:44:00.002+05:30

ഒരു പ്രേമം കൊണ്ട്

ശരീരം ഇങ്ങനെ കത്തിയിട്ടില്ല

ഒരിക്കലും.

സുഖത്തെക്കുറിച്ച്

പഠിക്കല്‍,

പ്രബന്ധങ്ങള്‍ തയ്യാറാക്കല്‍,

ഇതൊക്കെയായിരുന്നല്ലോ

ഇതുവരെ.

നിന്നെക്കുറിച്ച്.

2009-07-16T19:07:00.003+05:30

പുറത്തുപെയ്യുന്ന മഴയില്‍

ഒരാള്‍

ഒറ്റയ്ക്കു നടന്നു പോകുന്നു.

വിറയ്ക്കുന്നു, നടക്കുന്നു,

വിറയ്ക്കുമ്പോള്‍ നടക്കുന്നു.

എന്തോ തിടുക്കമുണ്ട്,

എന്തോ തിരയുന്നുണ്ട്.

എങ്ങോ നോക്കുന്നു,

എന്തോ കാണുന്നു,

എങ്ങും നോക്കുന്നു,

ഒന്നും കാണുന്നില്ല.

ഒരുപാടായി ഒറ്റയ്ക്കു നടന്ന

ഓരോ വഴികളില്‍ നിന്നും

ഉമ്മകള്‍,

പാട്ടുകള്‍,

നിറങ്ങള്‍ തുന്നിയ

ഒരു തൂവാല-

കാല്‍ വിരലുകള്‍ക്കിടയിലെ

കുഞ്ഞു വിടവിലൂടെ

ഓരോന്നായ് ഒളിഞ്ഞുനോക്കുന്നു.

എനിക്കും കേള്‍ക്കണമെന്നുണ്ട്

കെട്ടിപ്പിടിക്കണമെന്നുണ്ട്

ഞാനും വരാം

എന്നു പറയണമെന്നുണ്ട്.

പണ്ടെങ്ങോ കളഞ്ഞുപോയ

എന്റെ കുട

ഇപ്പോള്‍ തിരഞ്ഞാല്‍

കിട്ടുമായിരിക്കും.

രണ്ടു കവിതകള്‍

2009-06-01T13:43:00.003+05:30

പെണ്‍കുട്ടികളുടെ ചിരി
-------------------------

പണ്ടു മുതലേ അവരീ
പാവം പെണ്‍കുട്ടികളെ പറ്റിക്കുന്നതിങ്ങനെയാണ്.
നീയെന്തൊരു സുന്ദരിയാണ്.
നിന്റെ ചിരി, ഹൊ.

ഇങ്ങനെ കരുതിയാണ് രാവിലെ
ഒരു ദോശ കഴിക്കാമെന്നു വച്ച്
ഹോട്ടലിലേക്കു നടന്നത്.
മുന്നിലതാ, ഒരാകാശത്തിന്റെ വലിപ്പത്തില്‍
തെങ്ങോളം ഉയരത്തില്‍ വച്ച
ഒരു പെണ്‍കുട്ടിയുടെ മുഖം.
എന്തോ ആഭരണക്കട നല്ലതാണു പോലും.

പിന്നൊന്നു തിരിഞ്ഞപ്പോഴതാ മറ്റൊരു കുഞ്ഞിപ്പെണ്ണ്
നീളം കുറഞ്ഞ പാവാടയുടെ അറ്റത്തുപിടിച്ച്
കൊഞ്ചുന്ന പടം.
ഇത്തവണ ഒരു കാറാണ്.

സന്തോഷമായി.
ഇന്നാട്ടിലെ പെണ്‍കുട്ടികളെല്ലാം
മണ്ടികളായി എന്തു നന്നായായാണ്
അഭിനയിക്കുന്നത്!

വിഡ്ഢിത്തങ്ങളുടെ ചരിത്രം
------------------------------

ഒറ്റയ്ക്ക് ഈ മുറിയിലിരുന്ന്
രാത്രി തീര്‍ക്കാനുള്ള
ബുദ്ധിമുട്ടുകൊണ്ടു മാത്രമാണ്
എനിക്കിത്രമാത്രം കാമുകന്മാരുണ്ടായത്.

രതിമൂര്‍ഛകള്‍ക്ക് പരസ്പരം പറയാനുണ്ടായിരുന്നത്

2009-04-20T18:32:00.004+05:30

ഏതോ ഡേറ്റിംഗ് സൈറ്റിലാണ്
അയാള്‍ അവളെ കണ്ടത്.
നൂറ്റാണ്ടുകളായില്ലേ,
ഒന്നു പരിചയപ്പെട്ടുകളയാം.

നഗരത്തിലെ കോഫിഷോപ്പില്‍ കാത്തിരുന്നപ്പോള്‍
ഇങ്ങനെ ഒരുവളെയല്ല അയാള്‍
പ്രതീക്ഷിച്ചത്.
മുടിയില്‍ നിറങ്ങള്‍ തേച്ച്
കടും നീലയില്‍ ഓറഞ്ച് ചിത്രപ്പണിയുള്ള
ഒരു നീളന്‍ പാവാടയുമിട്ടു വന്ന
അവളെക്കണ്ടപ്പോള്‍
അയാള്‍ക്കിത്തിരി നാണം തോന്നി.
വന്നുപോയില്ലേ. ഇനിയെന്തു ചെയ്യാനാ.

ആദ്യത്തെ പരിചയപ്പെടല്‍ കഴിഞ്ഞ്
അയാള്‍
‘നിങ്ങള്‍ക്കറിയുമോ എന്നറിയില്ല
മാനവ സംസ്കാരത്തിനു തന്നെ ഉത്തരവാദി
ഞാനാണ്.
തലമുറകളെ സൃഷ്ടിക്കുന്നതും
നിയന്തിക്കുന്നതും ഞാനാണ്...’

ഇങ്ങനെ പ്രധാനപ്പെട്ട കാര്യങ്ങള്‍
പറഞ്ഞുകൊണ്ടിരിക്കുമ്പോള്‍
അവള്‍ ഐസ്ക്രീം കഴികുകയും
അങ്ങുമിങ്ങും നോക്കുകയും
ചെയ്തതില്‍ അയാള്‍ക്ക്
നീരസം തോന്നി.
ഹോ. സ്ത്രീകളെപ്പോലെ തന്നെ.
ചരിത്രത്തോട് ഒരുത്തരവാദിത്തവുമില്ലാത്തവള്‍.

കോഫീഷോപ്പില്‍ അപ്പുറത്തിരുന്ന്
കഫെ ലാറ്റെ കുടുച്ചുകൊണ്ടിക്കുന്ന
അവള്‍ക്ക് എന്നെ പരിചയമില്ല.
എന്നാലും ‘കോസ്മോപൊളിറ്റന്‍’ മാഗസിനില്‍
എന്നെക്കുറിച്ച് വായിച്ചിട്ടുണ്ടെന്നു തോന്നുന്നു.
തെരുവില്‍ അപ്പുറത്തിരുന്ന്
മീന്‍ വില്‍ക്കുന്നവര്‍
എന്നെക്കണ്ടിട്ടു പോലുമില്ല.

ഞാന്‍ ഇന്നലെ ജനിച്ച മട്ടിലാണല്ലോ
ഇയാള്‍ സംസാരിക്കുന്നത്.
ഇയാളെക്കുറിച്ച് മാത്രമല്ലേ
ഇതയും നാള്‍
ഞാന്‍ കേട്ടുകൊണ്ടിരുന്നത്.
എപ്പോഴെങ്കിലും
ഇയാളിലേക്കുള്ള
വഴിയില്‍ സ്ത്രീകളിലേക്ക്
രഹസ്യമായല്ലേ ഞാന്‍
പ്രവേശിച്ചിരുന്നത്.

എന്നെ ഒറ്റയ്ക്കും തെറ്റയ്ക്കും
സ്നേഹിച്ച സ്ത്രീകള്‍ക്ക്
എന്തു സംഭവിച്ചു
എന്നിപ്പോഴും അറിയില്ല.
ഉന്മാദത്തെക്കുറിച്ചുമാത്രമല്ലേ
ഞാന്‍ അവരോട്
സംസാരിച്ചിട്ടുള്ളൂ.

‘മനുഷ്യര്‍ എന്നെ എത്രമാത്രം
ബഹുമാനിക്കുന്നെന്നറിയാമോ..’
എന്നാണ് അയാളിപ്പോള്‍ പറയുന്നത്.

അവള്‍ ചിരിച്ചു.
ഞാന്‍ താമസിക്കുന്നത് എന്റെ കൂട്ടുകാരോടൊപ്പമാണ്.
ഇയാള്‍ക്ക് അവരെ അറിയില്ല.
ലിംഗം ഇല്ലാത്തവരുടെ,
ശരീരം എന്റേതാണെന്നു തോന്നാത്തവരുടെ,
പിന്നെയും ഉണ്ടെന്നുപോലുമാര്‍ക്കുമറിയാത്തവരുടെ
രതിമൂര്‍ഛകള്‍.
അവരിപ്പോഴും പുറത്തിറങ്ങാറില്ല.
നാട്ടുകാര്‍ തല്ലിക്കൊല്ലുമോ എന്ന പേടിയാണ്.
ഒളിച്ചുനടന്ന്
‘ഉന്മാദം, ഉന്മാദ’മെന്ന വഴി
ഏതൊക്കെയോ മനുഷ്യര്‍ക്ക്
കാണിച്ചുകൊടുക്കും.
എന്നിട്ട് ആരും കാണാതെ
തിരിച്ചുവന്നിരിക്കും.

ഇപ്പോള്‍ അയാള്‍
മതങ്ങളെക്കുറിച്ചും അവയില്‍ അയാള്‍ക്കുള്ള
പ്രാധാന്യത്തെക്കുറിച്ചുമാണ്
പറയുന്നത്.
‘ഉദാഹരണത്തിന്
ശിവലിംഗം..’

ഐസ്ക്രീം തീര്‍ന്നല്ലോ.
അവള്‍ എഴുന്നേറ്റ് പതുക്കെ അയാളുടെ
കവിളില്‍ത്തൊട്ടു.
‘യൂ നൊ വാട്ട്,
ഫക്ക് ഓഫ്’
എന്ന് മാത്രം പറഞ്ഞ്
തെരുവിലേക്കിറങ്ങി.

പ്രേമത്തെക്കുറിച്ച്.

2009-04-01T20:21:00.003+05:30

കടലല്‍ക്കരയില്‍

മഴവന്നപ്പോള്‍

നനയാന്‍ മടിച്ച്

കടലില്‍ ചാടിയതാണ്.

---

എത്രശ്രമിച്ചാലും സൂചിയില്‍

നൂലുകോര്‍ക്കാനാവില്ല.

എത്ര നോക്കിയാലും

എന്താണ് തടസ്സമെന്ന്‍

മനസ്സിലാവുകയുമില്ല.

---

കടലവറുക്കുന്നിടത്ത്

നിന്റെ മണം.

ബസ്സുകള്‍ പോവുകയും വരികയും

ചെയ്യുന്നിടത്ത് നീ.

തിരക്കിന്നിടയില്‍ ആരോ

അറിയാതെ തട്ടിയതാണ്,

നീ പറയാതെ

നിന്റെ ഒരുമ്മ.

മൂക്കി

2009-03-22T15:34:00.004+05:30

സ്വപ്നത്തില്‍ നിറയെ
അപരിചിതര്‍
അടുത്ത ബര്‍ത്തുകളില്‍
ഉറങ്ങാന്‍ പോകുന്നതിനു മുന്‍പേ
അവര്‍
എന്തെല്ലാമോ പറയുകയും ചിരിക്കുകയും

തൂക്കം കൂടിയ പെട്ടി
വെയിറ്റിംഗ് ലിസ്റ്റ്
ഇവിടെയെങ്കിലും സ്ഥലം കിട്ടുമായിരിക്കും

ടോയിലറ്റിനടുത്താണ്
മൂക്കിനൊരു ബലംപിടിത്തം
മണങ്ങള്‍
മൂത്രത്തിന്റെ മലത്തിന്റെ
പിന്നെയും

അയാള്‍ എന്തൊക്കെയോ പറഞ്ഞു
ടിക്കറ്റ് നോക്കി
തിരിച്ചുപോയി

ഉറങ്ങാന്‍ കിടന്നു
സ്വപ്നത്തില്‍ നിറയെ അപരിചിതര്‍
മണം മണം
കുലുക്കം

പെട്ടന്ന് എല്ലാവരും ഒറ്റ സ്വരത്തില്‍
‘വിശ്വ വിഖ്യാതമായ മൂക്ക്
ഇതുതന്നെയാവണം, അല്ലേ’എന്ന്
പൊട്ടിച്ചിരി

കണ്ണുതുറന്നു നോക്കി
ശരിയാണ്
ഇവര്‍ക്കെന്നോട് പരിഹാസം തന്നെയാണ്
മുഖത്തൊരു ഭാവവുമില്ലാതെ
എന്തൊരുറക്കം.

ഗേം പ്ലേ

2009-03-09T21:49:00.004+05:30

കളിച്ചുകൊണ്ടിരിക്കുകയായിരുന്നു.
കരണ്ടു പോയി.

ഗേമില്‍ മൂന്നാമത്തെ ലെവല്‍ എത്തിയതായിരുന്നു.
ദുഷ്ടന്മാരെ വെട്ടിവീഴ്തുകയും
ദൂരെയുള്ളവരെ വെടിവയ്ക്കുകയും
ചെയ്യുകയായിരുന്നു.
മുള്‍ക്കൂട്ടങ്ങള്‍ ചാടിക്കടന്നും
കായല്‍ നീന്തിക്കടന്നും
നീണ്ട വഴികള്‍ പിന്നിടുകയായിരുന്നു,
എന്റെ നായിക.

അടുത്ത പെട്ടിക്കടയില്‍പ്പോയി
സിഗററ്റ് വാങ്ങി വരാം.
നന്നായി ഇരുട്ടിയിട്ടുണ്ടല്ലോ.

എന്നാലും,
ആ തിരിവില്‍ വച്ച്
അവള്‍ ചൈനീസ് വേഷം ധരിച്ച
മൂന്നുപേരെ ഒറ്റവെട്ടിന് കൊന്നത്
എനിക്കിഷ്ടപ്പെട്ടു.

സിഗററ്റ് വാങ്ങി തിരിഞ്ഞുനടന്നു.
ഹെല്‍മെറ്റിട്ട ഒരാള്‍
പഴയ സ്കൂട്ടറില്‍ എതിരേ വരുന്നുണ്ട്.
പെട്ടന്നുള്ള പിടച്ചിലില്‍ ഇടത്തേ മുലയേ
അയാള്‍ക്ക് കൈയ്യില്‍ക്കിട്ടിയുള്ളൂ.
എത്ര പെട്ടന്നാണ് സ്കൂട്ടറിന് വേഗം കൂടിയതും
അയാള്‍ മറഞ്ഞതും.

ഇങ്ങനെയും ഗേമുകളുണ്ട്.
ഏതു ലെവലെത്തിയാലും തീരില്ല ചിലപ്പോള്‍.

എന്നാലും,
ആ തിരിവില്‍ വച്ച് അവള്‍
ആ മൂന്നുപേരെ കൊന്നത്.

ഐ റണ്‍ റ്റു ഫീല്‍

2009-02-12T15:04:00.009+05:30

കടല്‍ കപ്പല്‍ കാട് മല ആകാശം
തുടങ്ങിയ രൂപകങ്ങളില്‍നിന്ന്
പ്രണയം ഇറങ്ങിനടന്നു.
ഐ റണ്‍ ഫോര്‍ യൊര്‍ സിസ്റ്റര്‍ യൊര്‍ മദര്‍ യൊര്‍ വൈഫ്
ഐ റണ്‍ ഫോര്‍ ലൈഫ്
എന്ന് ഇടയ്ക്ക് മൂളി.

അവള്‍ ഇപ്പോള്‍ ഇതാ
ഇവിടെ
എന്റെ മുറിയില്‍
നഗ്നയായി ഇരിപ്പുണ്ട്,
നല്ല ക്ഷീണമുണ്ട്.

വെയില്‍ കൊണ്ട് നരച്ച മുടി
മഴകൊണ്ട് നീലിച്ച ശരീരം
കാ‍ട്ടുതീയില്‍ക്കത്തിയ രോമം.

എന്റെ കട്ടിലില്‍ ചാരിയിരുന്ന്
ഒരു സിഗററ്റ് കത്തിച്ച് ആഞ്ഞു വലിച്ചു.
തണുത്ത ബിയറുണ്ടോ? എന്ന് ചോദിച്ചു.

വര്‍ഷം ഇത്രയും കഴിഞ്ഞില്ലേ
എന്നെ ഇനിയും മതിയായില്ലേ
ജീവിച്ചുതുടങ്ങാന്‍ സമയമായില്ലേ
കവിതകളെഴുതിയാല്‍ പോരേ
എന്നൊക്കെ, എന്നോട്.

നീ പൊയ്ക്കോ.
നിന്നെ ആവശ്യമുള്ള ഒരുപാട് പേരുണ്ട്
വാലന്‍റ്റൈന്‍സ് ഡേ വരുന്നുണ്ട്.

എങ്കിലും ഞാന്‍ വിളിക്കുമ്പോള്‍ നീ വരണം,
ഉറങ്ങിക്കിടക്കുന്നവന്‍ ഇടയ്ക്ക് സ്വപ്നം കണ്ട് ഞെട്ടുമ്പോള്‍
മുറുക്കിപ്പിടിക്കാനുള്ളതാണ്.

ഐ ആം എ ഡിസ്കോ ഡാന്‍സര്‍

2009-02-06T00:24:00.002+05:30

റേഡിയോ മാങ്കോയിലെ പാട്ടുകള്‍ക്കൊപ്പം
റോട്ടിലങ്ങിങ്ങായ് കിടക്കുന്ന കുഴികളുടെ താളത്തിനൊപ്പവും
നൃത്തമാടിക്കൊണ്ടിരിക്കയാണവര്‍,
എന്റെ മുലകള്‍.

ഓട്ടോറിക്ഷാക്കാരന്റെ പിന്‍കാണിക്കണ്ണാടി
അവര്‍ക്കു നേരെ തിരിച്ചു വച്ചത്,
തുറന്നവ കാണാതെ കാണാതെ
മരവിച്ച ഒരു കണ്ണ്
വസ്ത്രങ്ങള്‍‍ക്കടിയില്‍ തപ്പിത്തടഞ്ഞത്
അവരറിയാഞ്ഞല്ല,

ഡാന്‍സിന്നിടയില്‍ ഇതൊന്നും ശ്രദ്ധിക്കാന്‍
അവര്‍ക്ക് സമയമേ ഇല്ല.

--
പഴയ ഒരു കവിത

അമ്മ

2009-01-31T18:40:00.007+05:30

നിങ്ങള്‍ നടന്ന വഴികളൊക്കെ
അളന്നുനോക്കുന്നുണ്ട്,

നടക്കാത്ത വഴികളെക്കുറിച്ച്
പരിതപിക്കുന്നുണ്ട്,

നടക്കാന്‍ പോകുന്നവയെക്കുറിച്ച്
വേവലാതിപ്പെടുന്നുണ്ട്.

ദാഹം, ദാഹമെന്നുപറഞ്ഞ്
ആവശ്യപ്പെടുന്നുണ്ട്,
പുതിയതരം പരാതികള്‍.

സ്നേഹം സ്നേഹമെന്നു പറഞ്ഞ്
ഉരുട്ടി വായില്‍ വച്ചുതരുന്നുണ്ട്,
പലതരം പരാധീനതകള്‍.

ആത്മീയത

2009-01-26T17:39:00.004+05:30

അടിപ്പാവാടയുടുത്താണ്
അവരെന്നും കുളിക്കുന്നത്.

എത്ര ശ്രമിച്ചാലും
അവര്‍ക്ക് കാണാതിരിക്കാനാവില്ല
അവരുടെ ശരീരം

മുലയിടുക്കുകള്‍,
സിമ്രാന്‍ സ്വിമ്മിംഗ് പൂളില്‍നിന്ന്
കയറിവരും

പൊക്കിള്‍,
വഴിയരികിലെ പോസ്റ്ററുകളില്‍
കണ്ടതുതന്നെ

യോനി,
കുട്ടിക്കാലത്തെ അമ്മാവന്മാര്‍

പിന്നെ
തുടകള്‍
കഴുത്ത്
കൈകള്‍.

ഇതെല്ലാമുള്ള ഒരു മനുഷ്യജീവിയായിരിക്കെ
മോക്ഷം
എങ്ങിനെയാണ് സാധ്യമാവുക?

ഒരു പ്രേമ കവിത

2009-01-20T11:45:00.004+05:30

അബദ്ധത്തില്‍
ആകാശത്തേക്കെങ്ങാനും നോക്കിയാല്‍
ആറാംക്ലാസ്സിലെ പെന്‍സില്‍ ‍ബോക്സെടുത്ത്
നേര്‍വരകള്‍ വരച്ചുതുടങ്ങും
ഞാന്‍ .

എത്ര
സമചതുരങ്ങള്‍
ദീര്‍ഘചതുരങ്ങള്‍
ത്രികോണങ്ങള്‍
അതാണെനിക്കറിയേണ്ടത്.

എന്നാണ്
പാമ്പുകളായും പറവകളായും
പോത്തായും
വേട്ടക്കാരനായും
അലഞ്ഞുനടക്കുന്ന നക്ഷത്രക്കൂട്ടങ്ങളെ
എനിക്ക് കാണാനാവുന്നത്?

ഹോമോഫോബിയ

2009-01-18T20:35:00.003+05:30

രണ്ടു സ്ത്രീകള്‍ ചേരുമ്പോള്‍
അവരെന്താണ് ചെയ്യുന്നത്?
പലരും ചോദിക്കാറുണ്ട്.

രണ്ടു മനുഷ്യര്‍ ചേര്‍ന്നാല്‍
അവര്‍ക്കെന്താണ്
ചെയ്തുകൂടാത്തത്?

ആരെങ്കിലും.

2009-01-15T18:31:00.000+05:30

കൃഷ്ണന് പണ്ടേ എന്നോടൊരു പ്രേമവുമില്ല
എനിക്ക് തിരിച്ചും.

യേശു ഷണ്ഢനായിരുന്നെന്ന്
എവിടെയോ വായിച്ചതിനു ശേഷം
കുരിശില്‍കിടക്കുന്ന അവന്റെ തുണി ഒന്നു മാറിയാല്‍,
എന്ന അശ്ലീലമല്ലാതെ
അയാളോടും എനിക്ക് വലിയ താല്പര്യമൊന്നുമില്ല.

പിന്നെ,
നബി, അവന്‍, ഇവന്‍,
ഒരു നൂറു പ്രവാചകന്മാര്‍.

ബുദ്ധന്‍ കൊള്ളാമെന്നു തോന്നിയിരുന്നു.
പക്ഷേ വിരക്തി ഒന്നിനോടും ഈയ്യടുത്തെനിക്ക്
ഉണ്ടാവുമെന്ന് തോന്നുന്നില്ല.

എങ്കിലും
അത്യാഹിത വാര്‍ഡില്‍
അത്യാസന്ന നിലയില്‍
ചുറ്റും കിടക്കുന്നവര്‍ക്ക്
ഇവരെങ്കിലുമുണ്ടല്ലോ.

കുട്ടിക്കളി

2009-01-10T14:15:00.000+05:30

എന്തുമാത്രം കളികളാണീ കുട്ടികൾക്ക്?

മുറിയുടെ അകത്താണെങ്കിൽ
പാമ്പും കോണിയും
പരിചിതമല്ലാത്ത മൃഗങ്ങൾ
പുതിയതരം തോക്കുകൾ
നിറഞ്ഞ
വീഡിയോ ഗേമുകൾ
പുറത്ത്
ഒളിച്ചുകളി
ഓടിത്തൊട്ടുകളി
ക്രിക്കെറ്റ്.

ജനിക്കുന്നതിനും മുന്നേ
അവൾക്ക് ഒരുപാട് കളികളറിയാം.

ഉപ്പുരസം കലർന്ന എന്റെ കടൽ വെള്ളത്തിലേക്ക്
അൽഭുതങ്ങളന്വേഷിച്ച്
അവളുടെ മുങ്ങാങ്കുഴി.
ഗർഭ ഭിത്തിയിലെ ചവിട്ടുതാളങ്ങൾ;
അവൾ ഒരു റോക്ക്സ്റ്റാർ.

അബോർഷനു തൊട്ടുമുൻപ്
പെത്തഡിൻ ബോധത്തിൻ
ഉച്ചസ്ഥായിയിൽ
ഒരു കാൽ‌പ്പെരുമാറ്റം,
അവൾ
ഒരു ബൈക്ക് റേസർ.

അങ്ങിനെ അവളും ഒരു കവിയായി

2009-01-09T11:03:00.000+05:30

കവിത ഒരനാവശ്യമാണെന്ന്
ഒരു ബുദ്ധിമുട്ടാണെന്ന്
അവള്‍ക്ക് പണ്ടേ അറിയാമായിരുന്നു.

കുഞ്ചന്‍ നമ്പ്യാരെയും
കുമാരനാശാനെയും
കണ്ട് പേടിച്ചതാണ്.

മഹാന്മാര്‍ക്കും ബുദ്ധിജീവികള്‍ക്കുമുള്ളതാണ്,
എന്നെപ്പോലെയുള്ള വെറും സ്ത്രീകള്‍ക്ക് പറഞ്ഞതല്ല.

പിന്നീട്
പ്രായം ചെന്നപ്പോള്‍
അവളെവിടെയോ വായിച്ചു
ഒരു കവിയാകണമെങ്കില്‍ വേണം
ഒരു പ്രണയനൈരാശ്യമെങ്കിലും.

ചില കാഴ്ചകള്‍ കാണണം
ചിലത് കാണാതിരിക്കണം

ഓര്‍മ്മകളില്‍ രമിക്കണം
കാമത്താല്‍ തളരണം
പ്രണയത്താല്‍ മുറിയണം

ഹോ.
ഇതാണോ?
ഇത്രയേ ഉള്ളൂ?
എന്നവള്‍ .

പ്രിയപ്പെട്ടവൾ

2009-01-06T17:13:00.000+05:30

കാവി തേച്ച് വിസ്താരമായത്
ഓലകൊണ്ട് മറച്ചത്
യൂറോപ്യൻ, കടലാസും മറ്റുമുള്ളത്

പൊട്ടിപ്പൊളിഞ്ഞ്
വർഷാന്തരങ്ങളിലെ
മലം, മൂത്രം, ശുക്ലം
തിരിച്ചറിയാനാവാതെ ഉറച്ചത്

പലരാൽ അവൾ പലതും ധരിച്ചു.

പൊതു നിരത്തുകളിൽ
റെയിൽ വേ സ്റ്റേഷനിൽ
ഫൈവ് സ്റ്റാർ ഹോട്ടലിൽ
അവളുമായി
വാതിലടച്ച്
ഞാൻ സ്വകാര്യം ചെയ്തു.

എന്റെ ആർത്തവരക്തത്തിന്റെ മണം
അവളുടെ ഞരമ്പുകളുലൂടെ ഒഴുകി ഇല്ലാതായി.

തുറന്നുവച്ച അവളുടെ തൊണ്ടയിലേക്ക്
മദ്യരാത്രിയുടെ അവശിഷ്ടങ്ങൾ
ഞാൻ ഛർദ്ദിച്ചു.

എല്ലാ പ്രണയാന്ത്യങ്ങളിലും
മുറതെറ്റാതെ
അവളോട് മാത്രം
ഞാൻ കരഞ്ഞു.

ശംഖുപുഷ്പം

2009-01-03T19:29:00.000+05:30

അല്ല,
ആരാണ് ഈ പൂവിന്
ഇങ്ങനെ പേരിട്ടത്?

കണ്ടില്ലേ,
ഓരോ പൂവും
ഉദ്ധരിച്ച ഒരു യോനിയാണ്‌.

രതിമൂർഛ അനുഭവിക്കാതെ മരിച്ച
നമ്മുടെ അമ്മമാർ
നമ്മെ നോക്കി ചിരിക്കുന്നതാണ്‌,
മതിൽ‌പ്പുറങ്ങളിൽ.