ആത്മീയത

അടിപ്പാവാടയുടുത്താണ്
അവരെന്നും കുളിക്കുന്നത്.

എത്ര ശ്രമിച്ചാലും
അവര്‍ക്ക് കാണാതിരിക്കാനാവില്ല
അവരുടെ ശരീരം

മുലയിടുക്കുകള്‍,
സിമ്രാന്‍ സ്വിമ്മിംഗ് പൂളില്‍നിന്ന്
കയറിവരും

പൊക്കിള്‍,
വഴിയരികിലെ പോസ്റ്ററുകളില്‍
കണ്ടതുതന്നെ

തുടകള്‍
കഴുത്ത്
കൈകള്‍.

ഇതെല്ലാമുള്ള ഒരു മനുഷ്യജീവിയായിരിക്കെ
മോക്ഷം
എങ്ങിനെയാണ് സാധ്യമാവുക?

ഒരു പ്രേമ കവിത

അബദ്ധത്തില്‍
ആകാശത്തേക്കെങ്ങാനും നോക്കിയാല്‍
ആറാംക്ലാസ്സിലെ പെന്‍സില്‍ ‍ബോക്സെടുത്ത്
നേര്‍വരകള്‍ വരച്ചുതുടങ്ങും
ഞാന്‍ .

എത്ര
സമചതുരങ്ങള്‍
ദീര്‍ഘചതുരങ്ങള്‍
ത്രികോണങ്ങള്‍
അതാണെനിക്കറിയേണ്ടത്.

എന്നാണ്
പാമ്പുകളായും പറവകളായും
പോത്തായും
വേട്ടക്കാരനായും
അലഞ്ഞുനടക്കുന്ന നക്ഷത്രക്കൂട്ടങ്ങളെ
എനിക്ക് കാണാനാവുന്നത്?

ഹോമോഫോബിയ

രണ്ടു സ്ത്രീകള്‍ ചേരുമ്പോള്‍
അവരെന്താണ് ചെയ്യുന്നത്?
പലരും ചോദിക്കാറുണ്ട്.

രണ്ടു മനുഷ്യര്‍ ചേര്‍ന്നാല്‍
അവര്‍ക്കെന്താണ്
ചെയ്തുകൂടാത്തത്?

ആരെങ്കിലും.

കൃഷ്ണന് പണ്ടേ എന്നോടൊരു പ്രേമവുമില്ല
എനിക്ക് തിരിച്ചും.

യേശു ഷണ്ഢനായിരുന്നെന്ന്
എവിടെയോ വായിച്ചതിനു ശേഷം
കുരിശില്‍കിടക്കുന്ന അവന്റെ തുണി ഒന്നു മാറിയാല്‍,
എന്ന അശ്ലീലമല്ലാതെ
അയാളോടും എനിക്ക് വലിയ താല്പര്യമൊന്നുമില്ല.

പിന്നെ,
നബി, അവന്‍, ഇവന്‍,
ഒരു നൂറു പ്രവാചകന്മാര്‍.

ബുദ്ധന്‍ കൊള്ളാമെന്നു തോന്നിയിരുന്നു.
പക്ഷേ വിരക്തി ഒന്നിനോടും ഈയ്യടുത്തെനിക്ക്
ഉണ്ടാവുമെന്ന് തോന്നുന്നില്ല.

എങ്കിലും
അത്യാഹിത വാര്‍ഡില്‍
അത്യാസന്ന നിലയില്‍
ചുറ്റും കിടക്കുന്നവര്‍ക്ക്
ഇവരെങ്കിലുമുണ്ടല്ലോ.

കുട്ടിക്കളി

എന്തുമാത്രം കളികളാണീ കുട്ടികൾക്ക്?

മുറിയുടെ അകത്താണെങ്കിൽ
പാമ്പും കോണിയും
പരിചിതമല്ലാത്ത മൃഗങ്ങൾ
പുതിയതരം തോക്കുകൾ
നിറഞ്ഞ
വീഡിയോ ഗേമുകൾ
പുറത്ത്
ഒളിച്ചുകളി
ഓടിത്തൊട്ടുകളി
ക്രിക്കെറ്റ്.

ജനിക്കുന്നതിനും മുന്നേ
അവൾക്ക് ഒരുപാട് കളികളറിയാം.

ഉപ്പുരസം കലർന്ന എന്റെ കടൽ വെള്ളത്തിലേക്ക്
അൽഭുതങ്ങളന്വേഷിച്ച്
അവളുടെ മുങ്ങാങ്കുഴി.
ഗർഭ ഭിത്തിയിലെ ചവിട്ടുതാളങ്ങൾ;
അവൾ ഒരു റോക്ക്സ്റ്റാർ.

അബോർഷനു തൊട്ടുമുൻപ്
പെത്തഡിൻ ബോധത്തിൻ
ഉച്ചസ്ഥായിയിൽ
ഒരു കാൽ‌പ്പെരുമാറ്റം,
അവൾ
ഒരു ബൈക്ക് റേസർ.